நண்பர்கள் தினம்

நண்பன் என்றால்

நல்லதையே

எண்ணி

பழகிடும்

அன்பு
இன்று உலகில் பல நண்பர்களை காண முடிகிறது . இன்றைய வாழ்வில் விரும்பியோ விரும்பாமலோ எல்லோரும் பாவிக்கிற ஓர் ஊடகம் முகப் புத்தகம் (facebook) இது கூட இரு நண்பர்களின் ஒரு முயற்சியே, கூகுளே(google) கூட இரு நண்பர்கள் ஆரம்பித்த ஒரு செயற்திட்டம். இவ்வாறாக பல நல்ல நண்பர்கள் மூலமாக நல்ல பல பலன்களை உலகம் கூட அனுபவிக்கின்றது

இன்று எதற்காக நாம் நண்பர்கள் தினம் கொண்டாடுகிறோம்? அன்று மட்டும் தான் நாம் நண்பர்களை நினைக்க வேண்டுமா? என்று என்னிடம் ஒரு நண்பன் கேட்கிறான், அதாவது ஒவ்வொரு நாளும் உணவு உண்கிறோம் எப்போதாவது ஹோட்டல் ஒன்றிக்கு போய் எமக்கு மிகவும் பிடித்த உணவை உண்கிறோம். பிடித்த உணவு என்பதற்காக ஒவ்வொருநாளும் அதையே உண்டுவந்தால் சலிப்பு ஏற்படும் அதைதான் பழக பழக பாலும் புளிக்கும் என்பது. நண்பர்கள் தினம் மட்டுமல்ல அன்னையர் தினமாகட்டும் தந்தையர் தினமாகட்டும் காதலர் தினமாகட்டும் ஒரு குறிபிட்ட திகதியில் அன்று உங்கள் உறவை வலுப்படுத்துகின்ற ஒரு நாளாக கொண்டப்பட்டு வருகின்றது. இதையே ஒரு சிலர் தங்கள் காதலை சொன்ன நாளை காதலர் தினமாக கொண்டாடுவது போல உங்கள் நண்பனை சந்தித்த நாளை நண்பர்கள் தினமாக கொண்டாட முடியும். அதற்காக அன்று மட்டும் தான் நண்பனை நினைப்பது என்றோ புகழுவது என்றோ பொருள் இல்லை. அதாவது உங்கள் நட்பின் அன்பு வெளிப்பாட்டை அல்லது உங்கள் நட்டபின் வளர்ச்சி பாதையை மீட்டி பார்க்கிற மற்றவரோடும் பகிர்ந்து மகிழுகின்ற ஒரு நாள்.

பெயர் குறிப்பிட விரும்பாத இரு நண்பர்களின் கதை ஒன்று

"ஓ நண்பனே..! நம் நட்பின் வரலாறை சற்றே சற்றே மீட்டி பார்க்கிறேன்

உனக்கு இவை பற்றி சிந்திக்க ஏது நேரம் ? என்பதை எண்ணி என் நினைவுகளை அனுப்பி வைக்கிறேன் நேரம் வரும் போது வாசித்து பார்..!

ஒரே வகுப்பறையில் அருகருகே முதல் சந்திப்பு, அங்கே நம் நிலை பகிர்ந்தோம், உன் கண்ணீர் கண்டு நிலை குலைந்த நான் அன்றே என் நிலை மறந்து, உனக்காக வாழ உறுதி கொண்டேன்.

அன்று முதல் இருவரும் இன்ப துன்பம் இரண்டையும் பகிர்ந்தோம் ஒரு தாய் பிள்ளை போல் சகோதரனை போல் வாழ்ந்திட்ட வாழ்வு.....!

எனக்காய் என் கண்கள் அழுததை விடவும் உனக்காய் கசிந்த நாட்கள் அதிகம் என்பது நீயே அறிந்த உண்மை.

எனக்காய் நான் தொழுத நாட்களிலும் உனக்காய் வணங்கிய நாட்களின் கணக்கு நான் தொழும் தெய்வத்துக்கு மட்டுமே தெரிந்த உண்மை

உனக்கு சற்றே தலை வலித்தாலும்,அதிகாலையிலும் முகம் கூட அலசாமல் முதல் ஆளாய் உன் வீட்டு வாசலில் நின்ற நாட்கள் உனக்கே தெரிந்தவை,

நீயும் என்னை போலவே இருந்தாயே..! என்னை கேட்காமல் எதையும் செய்ய மாட்டாய்,

இப்படியாய் எப்படியோ இருந்து விட்ட பிறகும், நானே இவற்றை எல்லாம் சொல்ல வேண்டிய துர்ப்பாக்கியசாலியாக இருக்கிறேன்.

இன்று திடீரென உன் கண்களை மறைத்தது என்ன ? எதனால் மாறினாய்

ஆனாலும் இந்த கடந்த கால வாழ்வில் இருந்து இன்று வரை பல கருத்து முறன்பாடுகள் இருந்தாலும் சகித்து கொண்டவன் திடிரென இவன் ஏன் இப்படி கோபித்து கொள்கிறான் என்று நீ நினைப்பது புரிந்ததால்தான் எழுதுகிறேன்

கடந்த சில வருடங்களாய் உனது சில நடவடிக்கைகளால் சில சமயங்களில் மனதளவில் பாதிக்க பட்டிருக்கிறேன் , வருத்தப்பட்டிருக்கிறேன் சில சமயங்களில் எமது நட்பின் நிலைக்காக சில சம்பவங்களையும் சகித்துகொண்டிருக்கிறேன், எல்லாவற்றுக்கும் ஏதோவொரு +(நேர்) காரணத்தை எனகுள்ளேயே உருவாக்கிக்கொண்டு நட்புக்காக விட்டுக்கொடுத்திருக்கிறேன்.

இவை எல்லாம் கடந்தும் நண்பன் என்ற உரிமையோடு என் கனவு ஒன்றை நனவாக்கும் உதவி கோரிய போதும், நீ என்னக்கு அளித்த வாக்குறுதியினை மீறிவிட்டாய், ஒரு நண்பனால் தனது கனவுகளை இழந்த முதல் நபர் நானாகத்தான் இருக்க முடியும்

ஆனாலும், உனக்கு நான் என்றும் இருக்கிறேன். உனக்கு உதவி செய்வதற்கு முதலில் வரும் ஆள் இனியும் எப்போதும் நான் தான். இதுவே எனது நட்பும் நட்பின் நியதியும்"

மேற்குறித்த கதையிலும் நண்பர்கள் ஒருவரை ஒருவர் சாடி கொள்கிறார்களே தவிர அங்கேயும் நட்பு என்பது இன்னும் மாறாது இருக்கிறது அங்கே தான் நாம் கொண்டாட வேண்டிய நண்பர்கள் தினம் நிலைத்து நிற்கின்றது.

நன்றிகளோடு

நண்பன்

- ராஜயுகன் -

பிற்குறிப்பு : நண்பன் என்பது நண்பிக்கும் பொருந்தும்

தந்தையர் தினம் தேடியதில் கிடைத்தவை

அன்னையர் தினம் வரும், பின்னே..... தந்தையர் தினமும் வரும் என்பது இப்போது உலக வழக்கமாகி வருகிறது. தாயிற் சிறந்த கோவிலுமில்லை, தந்தை சொல் மிக்க மந்திரமுமில்லை என்ற வைர வரிகளை வழங்கிய அவ்வை மூதாட்டி வாழ்ந்த காலத்தில் தோன்றியதா இந்த தந்தையர் தினம்?

பசுவின் கன்றை மகன் தேரிலிட்டுக் கொன்று விட்டான் என்பதற்காகத் தன் மகனையே தேர்க்காலில் இட்டுக் கொன்ற மன்னனின் புகழ் நிலைக்கவோ இந்தத் தந்தையர் தினம்! பற்று, பாசம், நேசம், உறவு இப்படி இல்லாமல் வயதுக்கு வந்து விட்டால் தாய் தந்தையைப் பிரிந்து தனித்து வாழுகிறதும், அண்ணன் என்னடா? தம்பி என்னடா அவசரமான உலகத்தில் என்று வாழுகிறதாகப் பலர் கருதுகிற அமெரிக்கத் திருநாட்டில் தான் இந்தத் தந்தையர் தினம் தோன்றியது!

சான்றோன் ஆக்குதல்.....

வில்லியம் ஜாக்சன் ஸ்மார்ட் அமெரிக்க இராணுவத்தில் பணிபுரிந்தவர்! 1862-ல் நடந்த போரில் கலந்து கொண்ட பிறகு வாஷிங்டன் அருகேயுள்ள ஸ்போகனே (Spokane) வுக்கு குடும்பத்தோடு சென்று வசித்தார். மகள் சொனாரா டோட்டுக்கு 16 வயதாகும் போது மனைவி எல்லன் விக்டோரியா மரணமடைந்தார். தன் மனைவி இறந்ததும் 5 மகன்கள் மற்றும் மகள்களுடன் வசித்தார். அவரை மறுமணம் செய்து கொள்ள சிலர் முன்வந்த போது மறுத்து விட்டு பிள்ளைகளை வளர்ப்பதில் கண்ணும் கருத்துமாக இருந்தார். வாலிபம் வீணாகிறது என்று செல்லமாகச் சொல்லி வளைத்துப் போடப் பார்த்த பெண்களின் ஆசை வார்த்தைகளுக்கு அடிமையாகி விடாமல் தம் இல்லாள் இல்லை என்ற குறை தெரியாமல், சான்றோன் ஆக்குதல் தந்தைக்கு கடனே... பிள்ளைகளை வளர்த்து வாலிபமாக்கினார்.

அருமைக் கணவர் இருக்கும்போதே மனைவி இன்னொருவருடன் வாழ்வதும், வாழ்ந்தால் உன்னோடுதான் என்று கைப்பிடித்த மனைவி இருக்கும் போதே கணவர் இன்னொரு பெண்ணுடன் வாழ்வதும் அமெரிக்காவில் அங்கிங்கெனாதபடி எங்கும் அசாதாரணமாக இருக்கிற போது தம் தந்தையின் வாழ்க்கையை மிகப் பெரிய தியாக வாழ்க்கையாகக் கருதினார் - மகள் ஸொனோரா ஸ்மார்ட் டோட்! (Sonora Smart Dodd ) திருமதி.டோட் அது மட்டுமல்ல, தமக்காக வாழாமல் பிள்ளைகளுக்காகவே வாழ்ந்து மறைந்த தியாக சீலரான தம் தந்தையைக் கெளரவிக்க வேண்டும் என்று எண்ணினார்.

அந்தக் கெளரவமும் தம் தந்தையோடு நின்று விடாமல் தந்தையர் ஒவ்வொருவருக்கும் அந்தக் கெளரவிப்பு கிடைக்க வேண்டும் என்றும் திருமதி.டோட் கருதினார்.

சுய நலத்தோடு கலந்த அவரின் பொதுநலம் தம் தந்தை பிறந்த ஜூன் 19 ம் தேதியை தந்தையர் தினமாக அறிவிக்க வேண்டும் என்ற கோரிக்கையை 1909 ம் ஆண்டு எழுப்பினார். அவரின் கோரிக்கை கரு மெல்ல உருப் பெற்று 5 வருடங்கள் கழித்து 1924ல் அதிகார வர்க்கத்தின் செவிகளில் விழுந்தது. அமெரிக்காவின் அன்றைய அதிபர் கால்வின், திருமதி.டோட்டின் யோசனையை நான் ஆதரிக்கிறேன் என்றார். 1926ல் நியூயார்க் நகரில் தேசிய தந்தையர் தினக் கமிட்டி அமைக்கப்பட்டு அதன் சாத்தியம் பற்றி ஆராய்ந்தது. அதன் பின் அந்த விசயம் கிடப்பில் போடப்பட்டு விட்டது.

அதற்கும் 30 வருடங்கள் கழித்து 1956ல் கோரிக்கை தூசி தட்டப்பட்டு தந்தையர் தினத்தை அங்கீகரித்து அமெரிக்க காங்கிரஸ் தீர்மானம் கொண்டு வந்தது.அதன் பிறகும் அரசு அதிகாரப் பூர்வமாக அங்கீகரித்து அறிவிக்கவில்லை. 1966ம் ஆண்டு அமெரிக்க அதிபர் ஜான்சன் ஜூன் மாதம் 3 வது ஞாயிற்றுக் கிழமையை "தந்தையர் தினம்" என அறிவிக்கலாம் என சட்ட முன் வடிவில் கையொப்பமிட்டார். அதற்குப் பத்து வருடங்கள் கழித்து ஆட்சிப் பொறுப்பை ஏற்ற அதிபர் ரிச்சர்ட் நிக்சன் 1972ல் அதிகாரப்பூர்வமாக தேசிய அளவில் "தந்தையர் தினம்" அனுசரிக்கஆணை பிறப்பித்தார். தனது கோரிக்கைக் கனவு பலிக்காமல் போய்விட்டதே என்ற கவலையோடு இருந்த திருமதி.டோட், அவரின் கனவு நனவான போது அதைப் பார்த்து சந்தோஷப்பட அவர் உயிரோடு இல்லை. ஆனால் இன்றைக்கு அமெரிக்காவில் மட்டுமல்ல பெரும்பாலான நாடுகள் "தந்தையர் தினம்" என்று உச்சரிக்கத் துவங்கியுள்ளதை அவரின் முயற்சிக்குக் கிடைத்த வெற்றி என்றே சொல்லலாம்.

ரோஜா...

தந்தையர் தினத்தில் மேலை நாடுகளில் அப்பாவுக்கு ஒரு சிவப்பு ரோஜாவைக் கொடுத்து வாழ்த்துவதும், பிள்ளைகள் சிவப்பு ரோஜாவை தங்கள் சட்டையில் அல்லது தலையில் செருகிக் கொள்வதையும் வழக்கில் கொண்டுள்ளனர்! அப்பா இயற்கை எய்தி விட்டால் தங்கள் சட்டையில் ஒரு வெள்ளை ரோஜாவை செருகிக் கொள்வது வழக்கம்!இவை எல்லாவற்றையும் விட அப்பா உங்களை நான் எவ்வளவு நேசிக்கிறேன் தெரியுமா? ஏன் நேசிக்கிறேன் தெரியுமா? என்று சொல்லி ஆரத்தழுவுவது வழமையான பழக்கங்களுள் முக்கியமான ஒன்று! எத்தனையோ இன்னல்கள் பட்டாலும் அதை வெளிக் காட்டாமல் துன்பத்தின் சாயல் தம் பிள்ளைகள் மீது படிந்து விடாமல் அனைத்தையும் தம் தோளில் சுமந்தே கூன் விழுந்து போன தந்தையர்கள். இராத்தூக்கம் பகல் தூக்கம் இன்றி வளர்த்து வாலிபமாக்க எவ்வளவு தியாகங்கள் புரிந்த, புரியும் தந்தையர்கள்! தவமாய் தவமிருந்து திரைப்படத்தில் சேரன் மகன் தந்தைக்காற்றும் கடனை மிகச் சிறப்பாகச் சொல்லியிருப்பார்!

கொஞ்சம் சிந்தனைகளை ஓடவிட்டுப் பாருங்கள். வாழ்க்கையில் ஒவ்வொரு தந்தையும் தன்னை ஆளாக்க பட்ட துயரங்கள் கொஞ்சமாவது உங்கள் கண்களைக் கலங்கவைக்கும். நீங்கள் இன்றைக்கு இருக்கும் நிலையை எண்ணிப்பாருங்கள்; நாளை இந்தச் சமுதாயம் உங்களைக் குறிப்பிடும் போது என்ன சொல்லும்? என்பதை அய்யன் வள்ளுவர் ஈராயிரம் ஆண்டுகளுக்கு முன்பே வெகு நேர்த்தியாகச் சொல்லிச் சென்றிருக்கிறார்.

"மகன் தந்தைக்கு ஆற்றும் உதவி,"இவன் தந்தைஎன் நோற்றான்கொல்" எனும் சொல்!

இந் நாளில் நம் தந்தையரை நாமும் இதய சுத்தியோடு அல்லவை மறந்து நல்லவை எண்ணி வாழ்த்துவோம்! வணங்குவோம். அவர் மனம் மகிழ அன்று மட்டுமாவது நேரம் ஒதுக்கி தந்தையோடு நேரத்தைச் செலவிடுவோம்.

உலகத் தந்தை

தந்தையர் தினம் கொண்டாடும் இந்த நாளில் மிக அதிகமான குழந்தைகளைப் பெற்ற தந்தையைப் பற்றி நாம் அறிந்து கொள்வோமா? சிலி நாட்டைச் சேர்ந்தவர் ஜெரோடோ. இவருக்கு வயது 65. இவரது மனைவி ஜூடி. இவருக்கு வயது 60. இந்தத் தம்பதியருக்கு எத்தனை குழந்தைகள் இருக்கும் என்று நினைக்கிறீர்கள்? உங்கள் கற்பனை உயரத்துக்கு எட்டாத குழந்தைகளைப் பெற்று கின்னஸ் புத்தகத்தில் இடம் பெற்ற தம்பதிகள் இவர்கள். இவர்களூக்கு ஆணும் பெண்ணுமாகப் பிறந்தவர்கள் 64 பேர்கள். இதில் உயிரோடு இருந்து, "தந்தையர் தின" வாழ்த்துச் சொல்வோர் மட்டும் 61 பேர்கள்!!! அடேங்கப்பா!? என்கிறீர்களா? இதற்கே வாய் பிளந்தால் எப்படி? இன்னொரு விசயம் சொன்னா அடேங்கம்மா...! என்பீர்களே.

ஆம்! திருமணமான 12 வயதிலிருந்தே, எல்லாம் அவன் செயல் என்று பெற்றுத் தள்ள ஆரம்பித்த ஜூடி, இப்போது நிறைமாத கர்ப்பிணியாக இருக்கிறார் என்பதுதான் அது! பதினாறும் பெற்று பெருக வாழ வாழ்த்தியவர்களின் வாழ்த்து தவறாக "சிக்ஸ்டி" என்று இவர்கள் காதில் விழுந்து விட்டதோ என்னவோ!?

வலையில் சிக்கிய புள்ளி விபரம்

கடந்த ஆண்டு அமெரிக்காவில் அன்னையர் தினத்தன்று 150 மில்லியன் வாழ்த்தட்டைகள் விற்பனையானது; தந்தையர் தினத்தில் 95 மில்லியன் வாழ்த்தட்டைகள்! அன்னையர் தினத்தில் அன்னையர்களை வாழ்த்திய தொலைபேசி அழைப்புகள் 150 மில்லியன்! தந்தையர் தினத்தில் 140 மில்லியன்! அன்னையர் தினத்தில் அன்னையர் விரும்பும் துணிகள் பரிசு பொருட்களாகவும், தந்தையர்க்கு பரிசுப் பொருளாக "டை" யையும் அளித்திருக்கின்றனர்! அன்று விற்பனையான டைகள் எட்டு மில்லியன்! தந்தையர் தினத்தில் 23 விழுக்காடு தந்தையர்கள் உணவு விடுதிகளுக்கு அழைத்துச் சென்று விருந்து கொடுத்து மகிழ்வித்ததாக புள்ளி விபரங்கள் புள்ளி போடுகின்றன.

நன்றி முத்துக்கமலம் இணையத்தளம்

நன்றிகளோடு நண்பன் யுகன்

5-Star Rating Widget

உலக தந்தையர் தினம் பற்றி மேலும் சில தகவல்கள்

எனது முந்தய பதிவில் இருந்த தவறு சகோதரி டயானா சதாசக்திநாதன் குறிபிட்டு காட்டிய மேற்கோள் மூலமாக தற்போது திருத்தபட்டுள்ளது. நன்றி சகோதரி. அதாவது தந்தையர் தினம் ஜூன் மாதத்தில் வருகின்ற இரண்டாவது ஞாயிற்றுக்கிழமையில் கொண்டாடப்டுவதாக குறிப்பிட்டிருந்தேன் அது உண்மையில் மூன்றாவது ஞாயிற்றுக்கிழமையில் தான் கொண்டாடபட்டு வருகின்றது.

அதாவது அமெரிக்கா ,கனடா உள்ளிட்ட 52 நாடுகளில் ஜூன் மூன்றாவது ஞாயிற்றுக்கிழமையிலும் , ஆஸ்திரேலியா, நியூஜிலாந்து போன்ற நாடுகளில் செப்டம்பர் முதல் ஞாயிற்றுக்கிழமையிலும், டென்மார்க்கில் ஜூன் மாதம் 5 ஆம் நாளிலும் ஏனைய நாடுகள் வேவ்வேறு பட்ட நாட்களிலும் கொண்டாடி வருகின்றன .

உலக தந்தையர் தினம் - (21/06/2009) திருத்தபட்ட பதிவு

உலக தந்தையர் தினம் ஒவ்வொரு ஆண்டும் ஜூன் மாதத்தில் வருகின்ற மூன்றாவது ஞாயிற்றுக் கிழமையில் கொண்டாடப்பட்டு வருகின்றது. இம்முறையும் ஜுன் 21நாள் கொண்டாடப்பட இருக்கிறது. அன்னையர் தினத்துக்கு கொடுக்கபடுகிற அளவு முக்கியத்துவம் தந்தையர் தினத்துக்கு கொடுக்கப்படுகிறதா என்றால் இல்லை, அதாவது பரவாயில்லை காதலர் தினத்தை கொண்டாட துடிக்கிற இளைஞர்கள் தம்மை தோளில் தூக்கி வளர்த்த தந்தையை மறந்து விடுகிறார்கள்.

தந்தை மகற்காற்று நன்றி
அவையத்து முந்தி இருப்பச் செயல். (குறள்)

மகன்தந்தைக்கு ஆற்றும் உதவி இவன்தந்தை
என்நோற்றான் கொல்எனும் சொல். (குறள்)

என்கிற வள்ளுவர் வாக்கிற்கு இணங்க ஒவ்வொரு மகனும் தந்தையும் செயற்படின் வையத்துள் வாழ்வது செழிப்புறும்.


தாயிட் சிறந்த கோவிலும் இல்லை
தந்தை சொல் மிக்க மந்திரமில்லை

மந்திரம் உச்சரிக்கபடுகிற போது தான் கோவில் புனித தன்மை பெறுகிறது நமது வேண்டுதலும் நிறைவேறுகிறது. அதேபோல, எமது தந்தையின் சொற்படி கேட்டு ஒவ்வொரு செயலும் செய்வோமானால் அதில் ஒரு பூரணதன்மையை உணரமுடியும்.

தந்தையின் பெருமையினை உணர ஒரு குட்டிக் கதை:

ஒரு நாள் ஒரு வயோதிப தந்தையும் இளவயது நிரம்பிய மகனும் வரவேற்பறையில் அமர்த்திருக்கிறார்கள். மகன் பத்திரிகை படித்துகொண்டிருக்கிறான். அப்பொழுது தந்தை அருகிலிருந்த தொலைகாட்சிபெட்டியை காண்பித்து இது என்ன மகனே என்று கேட்கிறார்? அதற்கு மகன் அதுதான் தொலைகாட்சிபெட்டி(TV) என்று பதிலளித்துவிட்டு மீண்டும் பத்திரிகை படிக்கிறான். சிறிது நேரத்திற்கு பின்னர் தகப்பனார் அதே கேள்வியை கேட்க, மகனோ சலிப்புற்றவனாய் "இப்பொழுது தானே சொன்னேன் அது தொலைகாட்சிபெட்டி(TV) என்று" என சற்று உரத்த குரலில் பதிலளித்துவிட்டு மீண்டும் பத்திரிகையில் மூழ்குகிறான். பொறுமையாக புன்முறுவலுடன் மகனை நோக்கிய தந்தை சற்று நேரம் கழித்து சற்றே தயங்கியவாறு மீண்டும் அதே கேள்வியை கேட்கிறார். மகனோ பொறுமை இழந்தவனாய் "எத்தனை முறை சொல்வது? ஒரு தடவை சொன்னால் புரியாதா?" என்றவாறு சினந்து தள்ளுகிறான். மீண்டும் எதையுமே காதில் வாங்கிக் கொள்ளாதவாறு மகனை பார்த்து புன்னகைத்துவிட்டு , மகனே உனக்கு நான்கு(04) வயதாக இருந்த்தபோது இதே கேள்வியை என்னிடம் நூறு தடவைக்கு மேல் கேட்டிருப்பாய் நானும் அத்தனை தடவையும் ஒரே பதிலை சலிக்காமல் சொல்லிகொண்டே இருப்பேன். நான் பதில் சொல்லாமல் இருந்தால் நீ அழ ஆரம்பித்து விடுவாய். இப்பொழுது மூன்று முறை பதில் சொல்வதற்கே உன்னால் முடியவில்லை. என்று சொன்னார் மீண்டும் புன்னகைத்தபடி.

இதே போலவே நாமும் முன்னாளில் தாய், தந்தையர் நமக்காக செய்த நற்காரியங்களை காலபோக்கில் மறந்து விடுகிறோம் அல்லது அறியாமலே இருந்துவிடுகிறோம்.

காதலர் தினத்துக்காக எவ்வளவோ முன் ஆயத்தங்கள் செய்கிற நாம். அன்று எம்மை தோளில் தூக்கி வளர்த்த தந்தைக்காக ஏன் தந்தையர் தினத்தை கொண்டாட மறந்து விடுகிறோம்?

எனவே நாம் ஒவ்வொருவரும் இன்நாளில் தந்தையின் பெருமைகளை நினைத்து கொண்டாடி மகிழ்வோம்.

மீண்டும் சந்திக்கும் வரை ....!
நன்றிகளோடு நண்பன் - யுகன் -